Biodata

Temegah gaga ria bala sida sebilik nyambut penatai orang baru ba bilik sida. Serintak sabak iya nanda ke iya datai ngagai dunya tu enggau nadai apa nama. Ivy tauka Uleyvia Ubang, ada lalu merengik kena 31 Oktober di Kemunting, Taiping, Perak. Iya ada di Perak laban apai iya maya nya suba gawa nyadi sedadu First Ranger (Satu Renjer) di Silver Line, Ipoh, Perak.

Ivy tu anak kelima ari tujuh iku diri menyadi (siku lelaki, enam indu) ti chukup rinduka jaku bansa diri. Nya kebuah iya chukup landik bejaku Iban taja bala bakih enggau begulai maya agi mit suba tebal agi bansa bukai baka Melayu, India enggau China. Ari nya kitai ulih melaba, maya agi mit Ivy jarang bejaku Iban. Tang taja pia, ketegal pengangkun enggau penaluk iya ke jaku bansa diri, nya ti ngasuh Ivy nadai penimpang ba jaku Iban. Mayuh agi nembiak kitai Iban ti ada di Sarawak tu enda landik bejaku Iban enti sida ada ba nengeri.

Ivy kala nampuk penemu sepengelama dua taun ba Kindergarden di Batu 14, Kem Oya, Sibu. Udah nya iya besekula ba SRK. Kem Oya, Sibu. Pom 1-3 Ivy besekula di SMK Green Road, Kuching lalu pom 4-5 di SMK Pending, Kuching. Abis besekula suba, Ivy belajar sambil gawa ba MARA di Satok, Kuching tang sangkut ba tengah jalai ku iya ketegal ti bulih gawa nyadi Part Time Dancer ba Kampung Budaya Sarawak. Maya nya apai iya agi gawa nyadi Tuai Rumah ba rumah panjai Iban di Kampung Budaya Sarawak.

Sepengudah abis besekula suba, Ivy udah kala gawa nyadi waitress, cashier, kerani enggau manager pub. Iya mega kala nyadi DJ bagian Iban enggau Melayu ba Radio Kenyalang (Diatu CATS FM). Diatu Ivy gawa nyadi Pengarang Berita enggau Marketing ba suratkabar Iban Buletin Kenyalang di Kuching ba baruh perabung kompeni MD Publication enggau gawa nyadi Part Time DJ ba Cats FM begian Iban. Ivy madahka diri puas ati laban ‘pengalaman’ ti udah kala diasai, udah kala ditujah ditengah iya nya nyadika kunchi jalai pengidup iya. Iya mega meri besai terima kasih ngagai Tuai Besai MD Publication, Ex-YB Donald Lawan laban ti udah mayuh meri iya jaku peransang ngagai iya.

Sekumbang ke udah begelar penanyi, Ivy udah ngeluarka dua iti album ti diberi nama Ambai Lalai enggau Bujang Tangkai Ati/Ambai Sabah. Orang ke ngaga tiun enggau leka lagu aku dalam album Ambai Lalai Ivy iya nya David Till, A. Ngalai enggau J. Jeraki. Dalam album kedua iya (Bujang Tangkai ati) Alquaz Jackie enggau Yazit ti mayuh nulung Ivy ngaga tiun enggau leka lagu. Kelimpah ke belagu, Ivy mega kala belakun ba Telemovie Os Anak Tarzan. Dalam telemovie tu iya nyadi indai Os. Dalam taun 2004 enggau 2005, iya mega nyadi Host ba Album Gawai ANP. Lebuh ke nyaut tanya kami pasal adat enggau main asal kitai bansa ti bisi ditemu iya, dia Ivy mina madahka diri landik ngajat taja pan apai iya nya siku Lemambang. Indai iya mega siku tukang sih tauka begendang. Kenu ku Ivy, nyangka semua pengelandik nya semina 30 persen aja ti diturunka ngagai Ivy. Maya lepa ari ngereja semua pengawa Ivy rindu belagu, macha bup enggau BeSMS.

Baka orang bukai mega, Ivy enda kala bekenyapka diri tau nyadi DJ baka ke diatu laban juluk ati iya suba deka nyadi indu misi. Ka ngintu ngemparu orang ke sakit.Nadai ku enggau mih, kitai semina merambu tang Petara ti nentuka semua utai ti nyadi, pia ku Ivy empu. Ari ninga iya kucah-kucah bejaku dalam radio, dia kitai nemu Ivy tu endang orang ke kemerah enggau berandau maya betemu. Di umbaka enggau tuchum lelegup iya, nya ti ngasuh orang enda nemu leju berandau enggau Ivy. Bungah iya semampai ngerindu ke ati bala ti enggau iya betunga. Ivy endang nadai sayau ke jaku maya berandau enggau bala ke enggau iya begulai. Iya nemu amat lebas jaku bungah enggau jaku ti ukai kena begagai.

“nadai siku kitai ngembuan pengelandik ti nadai penimpang semadi nuan empu ngaduka diri ngambika nadai pengurang. Semina pending mesti ka selalu tebal. Anang lalu ka nyida muras pedis ati. Nya alai kitai mesti ka nemu ngibun jaku enggau ulah kini-kini ke tunga kitai mindah. Bejaku enda tau enda ensuruk, anang ngeninggi ke diri ” ku Ivy.

Ivy mega madah, nyanggit ke nama ba dunya pemerindang ukai menasan ke nyamai ditujah laban ukai semua orang rindu magang. Enda semua orang nyukung. Mayuh unak mayuh lemetak ti semampai ngipa pejalai pengidup. Duri-duri pengusang endang semampai bekerejak nukak nganti ti kena indik kaki bejalai tang enggau pengeliat ati kitai mesti ka datai ba penyangkai mantup ke diri ba bandir. Lebuh ke nerima jaku puji asai tak lapang dada sereta temegah dalam ati tang enti maya nerima jaku ti bejai, asai ke ka labuh ai mata…asai ke dipandam dada. Kekadang kitai dianu lalu dikutuk tang kitai enda nemu penyalah diri, tambah Ivy bekerut kening. Kitai mesti deka selalu ingat ke jaku tu ku Ivy, Nobody is perfect unless you make it perfect for yourself. Reti iya kurang lebih baka tu, nadai siku kitai ngembuan pengelandik ti nadai penimpang semadi nuan empu ngaduka diri ngambika nadai pengurang. Semina pending mesti ka selalu tebal. Anang lalu ka nyida muras pedis ati. Nya alai kitai mesti ka nemu ngibun jaku enggau ulah kini-kini ke tunga kitai mindah. Bejaku enda tau enda ensuruk, anang ngeninggi ke diri, Ivy bejaku lembut.